Ыам ыйын 29 күнүгэр «Культура-норуоппут үйэлээх үгэһэ!»-Уус-Алдан улууһун культуратын үлэһиттэригэр аналлаах ыһыах тэрилиннэ. Ыһыах нэһилиэктэринэн сэлэлээн хаамыыттан саҕаланна. Ол кэннэ алгысчыт үрүҥ күнтэн, айыылартан көрдөһөн дьону арчылыыр Алгыс сиэрэ-туома ыытылынна, алгысчыт Виталий Очиров. Үөрүүлээх дьоро күҥҥэ эҕэрдэлээтилэр, наҕараадалары туттардылар Уус-Алдан улууһун Аҕа баһылыга Алексеев В. П., культура управлениятын начальнига Киренская Э. М, биир идэлээхтэр сойуустарын председателя Заровняев Б. И. Тэрээһиҥҥэ культура үлэһиттэрэ 4 хамаандаҕа арахсан араас күрэхтэргэ күрэхтэстилэр. Биһиги «Түмсүү» норуот айымньытын киинин коллектива, «Доҕордоһуу» түмэлин, Хоноҕордооҕу «Түһүлгэ» сынньалаҥ киин, Суоттутааҕы «Мичээр» сынньалаҥ киин үлэһиттэрин кытта «Лена совхоз» диэн хамаанда тэринэн кытынныбыт. Ол курдук: түһүлгэни киэргэтии, «Сахалыы сандалым маанылаах аһа», күргүөмүнэн ырыа, үҥкүү күрэһэ, «Дьулус, тулуй, кыай !» дэгит көрүҥнэргэ күөн көрүстүбүт. Тыҥааһыннаах киирсии кэннэ уопсай түмүккэ 3 миэстэни ылан грамотанан, бирииһинэн наҕараадаланныбыт. Түмүккэ улуус культуратын үлэһиттэрэ өйдөбүнньүк хаартыскаҕа түһүүнэн тэрээһин түмүктэннэ.
