Бэс ыйын 14 күнүгэр «Түмсүү» сынньалаҥ киинигэр тустуу үс көрүҥэр ССРС, РСФСР, Саха АССР спордун маастара, Саха республикатын үтүөлээх тренера Иннокентий Андреевич Халдеевка аналлаах «Айыллан» норуот тыйаатырын туруоруутугар «Саҕыллыы» театрализованнай дьүһүйүү көрөөччү дьүүлүгэр таҕыста. Туруорааччы-режиссер А. А. Макаров., сценарист А. С. Сокольникова. «Саҕыллыы» дьүһүйүүгэ И. А. Халдеев олоҕун кэрчиктэриттэн спорт эйгэтигэр үүннэрбит бастакы үөрэнээччилэрин туһунан көрдөрүлүннэ. Норуот тыйаатырын кыра, улахан бөлөҕүн артыыстара бэрт итэҕэтиилээхтик оонньоон көрөөччү биһирэбилин ыллылар. Дьүһүйүү бүтэһик түһүмэҕэр И. А. Халдеев үөрэнээччилэрэ тренердэрин туһунан кылгас ахтыы оҥордулар. Тэрээһин түмүгэр И. А. Халдеев уолаттара, «Айыллан» норуот тыйаатырын артыыстара өйдөбүнньүк хаартыскаҕа түстүлэр.
