Бэс ыйын 14-15 күннэригэр Бороҕон нэһилиэгэр Россияҕа-Дьиэ-кэргэн, Саха республикатыгар-Оҕо саас, Уус-Алдан улууһугар-Аҕа сылларынан уонна тустуу үс көрүҥэр ССРС, РСФСР, Саха АССР спордун маастара, Саха республикатын үтүөлээх тренера И. А. Халдеев «Халдеев хапсаҕайа» Бороҕон нэһилиэгэр республиканскай ыһыах ыытылынна. «Ыһыах алгыһын куппар-сүрбэр иҥэрэн» ыһыах алгыһын сиэрин-туомун Саха республикатын культуратын туйгуна, алгысчыт, ырыаһыт Виталий Очиров түһүлгэҕэ мустубут ыһыах дьонун алҕаата, арчылаата. «Кымыс үрдүн охторуу» ыытыллар түһүлгэтигэр тиийэн Бороҕон нэһилиэгин аҕа баһылыга Алексеев В. П. кымыс үрдүн охторуу сиэрэ-туома ыытылынна. Тоҕуоруһа мустубут дьоҥҥо-сэргэҕэ кыынньар кымыһынан, алгыстаах алаадьынан айах туттулар, күндүлээтилэр. Самаан сайын үөрүүтүн үллэстэн нэһилиэк Аҕа баһылыга В. П. Алексеев үрүҥ тунах ыһыах бэлиэтин Ытык Дуоҕаны анньан ыһыах саҕаламмытын биллэрдэ. Дьаһалта баһылыга Алексеев В. П. Уус-Алдан улууһун баһылыгын солбуйааччы Троев И. И., бу сылга үлэлэригэр үрдүк ситиһиилээх дьоммут, үөрүүлээх быһыыга-майгыга наҕараада тутан үөрүүлэрэ үксээтэ. Ыһыах кэнсиэрэ үҥкүүнэн, ырыанан доҕуһуолланна, кэнсиэри киэргэттэ Саха республикатын культуратын туйгуна, алгысчыт, ырыаһыт Виталий Очиров ыллаан-туойан, күргүөм оһуокайы тэрийэн үгүс дьону муста. Дьон-сэргэ ыһыах мааны аһыгар түөлбэлээн олорон ирэ-хоро кэпсэттэннэр, ыһыах ыытар күрэхтэрин сэргии көрдүлэр. Республиканскай «Халдеев хапсаҕайа» республика араас муннуктарыттан бөҕөстөрү түмэн бэрт тыҥааһыннаахтык ааста. Биир дойдулаахпыт, Саха республикатын «Аҕа Лигатын» салайааччыта, СР тутааччыларын союһун генеральнай директора Габышев А. И. бирииһигэр 3 көрүҥҥэ илин-кэлин түһүстүлэр. Ол курдук саастарынан оҕолорго, улахан дьоҥҥо сүүрүү, хапсаҕай, мас-тардыһыыта күрэхтэр ыытылыннылар. Россияҕа- Дьиэ-кэргэн сылынан, Саха республикатыгар-Оҕо сылларынан «Ырыа куттаах дьиэ-кэргэн» диэн ырыа күрэҕэ тэрилиннэ. Күрэх түмүгүнэн 1 миэстэ Новоприезжая М. А. сиэннэринээн, 2 миэстэни ыллылар Вера, Анатолий Габышевтар, 3 миэстэ Новикова Н. В оҕолорунаан. Бу күрэххэ Мария Дмитриевна, Анатолий Иванович Ивановтар дьиэ-кэргэн ансаамбыл аатынан кини оҕолоро, сиэннэрэ олохтообут бириистэринэн, грамотанан наҕараадаланнылар. «Көмүлүөк» үһүс саас оскуолата, «Аал уот» түмсүү «Кыл-сиэл алыба» диэн кылтан-сиэлтэн оҥоһуллубут киэргэллэри, оҥоһуктары көрөөччү дьүүлүгэр таһаардылар. «Саха талба-мааны таҥаһа» дефиле нэһилиэк иистэнньэҥэ Анастасия Габышева тикпит таҥастарын көрдөрдө, көрөөччүлэр биһирэбиллэрин ылла. Уус-Алдан улууһугар Аҕа сылынан кадровай булчут Алексеев Гаврил Тихонович бирииһигэр «Байанайдаах булчут» нэһилиэк аҕаларыгар ох саанан ытыы күрэҕэ тэриллэн 1 миэстэни ылла Барашков М. А., 2 миэстэ Алексеев В. В., 3 миэстэ Егоров Л. С. Күрэххэ Алексеев Гаврил Тихонович оҕолоро, «Түмсүү» с/к олохтообут анал бириистэринэн, грамотанан наҕараадаланнылар. Киэһэ «Түмсүү» сынньалаҥ киинигэр Халдеевтар дьиэ-кэргэн, олохтоох библиотека үлэһитэ Прудецкая С. А., музей салайааччыта Сокольникова А. С. фондаларыттан матырыйааллар «Халдеев хапсаҕайа» быыстапкаҕа көрдөрүүгэ туран сырдатылынна. Үс тустуу маастара И. А. Халдеевка аналлаах «Айыллан» норуот тыйаатырын туруоруутугар «Саҕыллыы» театрализованнай дьүһүйүү дьон-сэргэ сэҥээриитин ылла. Туруорааччы-режиссер Макаров А. А., сценарист Сокольникова А. С. Ол кэннэ «Мин дойдум» диэн биир дойдулаахпыт Василий Новоприезжай гастрольнай бөлөҕүн эҕэрдэ кэнсиэрэ, уоттаах-күөстээх дискотека ыытылынна. Ыһыах иккис күнүгэр республиканскай хапсаҕай ыһыаҕын салҕыыта, финальнай, абсолютнай хапсыһыылар ыытылыннылар. Маны таһынан 5 көрүҥҥэ хапсаҕай кыттааччыларыгар өбүгэ оонньууларыгар күрэх тэриллэн бэрт тыҥааһыннаахтык ааста. Кыайыылаахтар көрүҥ аайы уу харчынан бириэмийэнэн, грамоталарынан наҕараадаланнылар.
