Алтынньы ый 9 күнүгэр «Түмсүү» норуот айымньытын киинигэр нэһилиэкпитигэр өр сылларга үтүө суобастаахтык салайан, инники күөҥҥэ таһааран кэлбит аҕа баһылыкпыт , улуус-сэргэтин итэҕэлин ылан Уус-Алдан улууһун салайар үрдүк аат иҥэриллибитин чиэһигэр Бороҕон нэһилиэгин тэрилтэлэрэ, общественнаһа, түмсүүлэрэ, дьоно-сэргэтэ ис сүрэхтэн Алексеев Василий Петровичка анаан «Махтал киэһэтэ» тэрилиннэ. Тэрээһин алгыс тыл этиититтэн саҕаланна, алгысчыт Сокольникова Акулина Степановна. Дьоро күҥҥэ 3 кылаас үөрэнээччилэрин толоруутугар «Улуу төрүппүт Сэһэн Ардьакыап» аатыгар доргуччу монтаж ааҕылынна, салайааччылар Сокольникова А. С., Аввакумова Л. М., Дьоро күҥҥэ нэһилиэк тэрилтэлэрэ, түмсүүлэрэ ол курдук: олохтоох дьаһалта, депутаттар сэбиэттэрэ, В. М. Прокопьев аатынан Тумул орто оскуолата, «Тумулчаана» оҕо саада, балыыһа коллектива, «Түмсүү» норуот айымньытын киинэ, дьиэ-уот коммунальнай хаһаайыстыба, бииргэ үөрэммит кылааһын оҕолоро, «Аал уот», «Көмүлүөк» түмсүүлэрэ эҕэрдэ тылын бастыҥнарын анаатылар, сэмэй бэлэхтэрин бэлэхтээтилэр, ырыанан эҕэрдэлэрин тиэртилэр. Василий Петрович махтанан, үөрэн-көтөн-туран харда тылын эттэ. Түмүккэ бары күргүөмүнэн И. Халдеев тылларыгар, И. Алексеев матыыбыгар «Тупса турдун Тумул сирэ» ырыаны анаатылар, уопсай хаартыскаҕа түһүүнэн дьоро күн түмүктэннэ. Саҥа талыллыбыт Уус-Алдан улууһун баһылыгын дуоһунаһыгар В. П. Алексеевка төрөөбүт төрүт түөлбэн сайдыытыгар ситиһиигин үрдүктүк сыаналаан туран өссө төгүл махталбытын тиэрдэбит, тус олоххор дьолу-соргуну, чэгиэн доруобуйаны баҕарабыт.
