Ыам ыйын 8 күнүгэр ТСТ Бороҕон нэһилиэгэр Улуу Кыайыы 80 сылын көрсө бүтүн Россиятааҕы «Өйдөбүнньүк чүмэчи» акцияҕа кыттыһан киэһэ «Кыайыы түһүлгэтэ» болуоссакка дьон-сэргэ тоҕуоруһа муһунна. Нэһилиэк олохтоохторо сэриигэ кыттыбыт эһэлэрбитин, убайдарбытын, аҕаларбытын, таайдарбытын, тыылга үлэлээбит эбэлэрбитин, ийэлэрбитин, эдьиийдэрбитин кэриэстээн, ахтан-санаан өйдөбүнньүк чүмэчини уматан уурдулар. Түмүккэ олохтоохтор Винокуров Чаҕылхан тылларыгар, Костин матыыбыгар «Хайыһар» ырыаны доргуччу ыллаан республиканскай акцияҕа кытыннылар. Уоттаах кыргыһыыларга биһиги биир дойдулаахтарбыт хорсуннук сэриилэспиттэрэ, дьоммут-сэргэбит килбиэннээх үлэлэринэн кыайыыны уһансыбыттара. Хорсун быһыы кэмҥэ-кэрдиигэ бэриммэт, тугунан да кэмнэммэт нэһилиэстибэни харыстыырбыт барыбыт ытык иэспит.
