Ахсынньы 3 күнүгэр Мүрү нэһилиэгэр Хомусчут-импровизатор, СӨ культуратын туйгуна, Тандатааҕы норуот айымньытын киинин директора Альберт Находкин авторскай бырайыагынан республикатааҕы «Хомус кырдала-2024» хомусчуттар түһүлгэлэрэ тэрилиннэ. Уопсайа күрэххэ 172 кыттааччы, ол иһигэр 9 оҕо ансаамбыла, 6 улахан дьон ансаамбыла, 34 биирдиилээн кыттааччы кыттыыны ыллылар. Күрэҕи дьүүллээтилэр уонна маастар кылааһы ыыттылар СӨ үтүөлээх артыыһа Альбина Дегтярeва, хомусчут Айсен Дьоллоохоп. Биһиги нэһилиэктэн күрэххэ «Татыйык» фольклорнай бөлөх кыттан, көрүү түмүгүнэн 1 степеннээх лауреат үрдүк аатын ылан грамотанан, сыаналаах бирииһинэн наҕараадаланнылар. Күрэххэ кыттыбыт ансаамбыл кыттыылаахтарыгар махталбытын тиэрдэбит.
