Бүгүн, балаҕан ыйын 17 күнүгэр, нэһилиэкпитигэр саҥа суолбут арыллыытын үөрүүлээх чааһа буолан ааста. Аһыллыы сиэригэр-туомугар кыттыыны ыллылар: Жирков Александр Николаевич — Саха Өрөспүүблукэтин Ил Түмэн Государственнай мунньаҕын бэрэссэдээтэлин бастакы солбуйааччыта; Данчикова Галина Иннокентьевна — Российскай Федерация Государственнай Думатын депутата; Сивцев Владимир Михайлович — Саха Республикатын тырааныспарга уонна суол хаһаайыстыбатын миниистирэ; Алексеев Василий Петрович — Уус Алдан улууһун баһылыга. Тэрээһин өбүгэбит үтүө үгэһинэн арыылаах алаадьынан, кымыһынан айах тутууттан уонна алгыс сиэрин-туомун ыытыыттан саҕаланна. Кэлбит салайааччылар аалай лиэнтэни кырыйан күүтүүлээх суол аһыллыбытын биллэрдилэр. Салгыы суолга үлэлээбит туруу үлэһиттэри, салайааччылары эҕэрдэлээһин, наҕараадалааһын үөрүүлээх быһыыга-майгыга ыытылынна. Дьон-сэргэ, оскуола оҕолоро тоҕуоруһа мустан өр күүппүт баҕа санаалара туолбутунан сүргэлэрэ көтөҕүллэн үөрүүлэрэ үрдээтэ. Түмүккэ саҥа суол аартыгын арыйан массыыналарынан парадтаан аастылар, уопсай хаартыскаҕа түстүлэр.
