Алтынньы 25 күнүгэр «Түмсүү» сынньалаҥ киинигэр «100 сыл кэрэни, сырдыгы саҕан» Уус-Адан улууһугар бастакы норуодунай библиотека тэриллибитэ 100 сылынан улуус киин библиотекатын специалистара, директор Копырин И. Д. салайааччылаах ыалдьыттаатылар. Библиотека историятын сырдатар хаартысканан быыстапка, Саха Республикатын культуратын туйгуна, культура ветерана, Уус-Алдан улууһун уонна Бороҕон нэһилиэгин Бочуоттаах олохтооҕо Халдеева А. Р. айар үлэтин, уус-уран оҥоһуктарын көрдөрөр улахан быыстапка, кинигэ быыстапката туруорулунна. Тэрээһини улуустааҕы киин библиотека үлэһиттэрэ иилээн-саҕалаан ыыттылар. Улууска, нэһилиэккэ библиотечнай эйгэ сайдыытын, историятын кэпсиир «Библиотека сайдыытын түһүмэхтэрэ» иһитиннэриилэрэ дьон-сэргэ биһирэбилин ылла. Тэрээьин нэһилиэк аҕа баһылыга В. П. Алексеев, улуус кииннэммит библиотекатын тиһигин директора И. Д. Копырин истиҥ эҕэрдэлэриттэн саҕаланна. Улуустааҕы кииннэммит библиотека ситимнээхтик үлэлэһэр тэрилтэ салайааччыларыгар Копырин И. Д., нэһилиэк бастыҥ ааҕар дьиэ-кэргэттэригэр олохтоох библиотекарь Прудецкая С. А. махтал суруктары туттартаатылар. Нэһилиэк библиотекатыгар өр сылларга таһаарыылаахтык үлэлээбит Халдеева А. Р. сырдык аатын үйэтитэн олохтоох библиотекаҕа Халдеевтар ааттарыттан 30.000 тыһ сууммалаах сертификаты бэлэх ууннулар. Нэһилиэк олохтоохторо, Тумул орто оскуолатын коллектива, профкома эҕэрдэ тыллары эттилэр. Тэрээһиҥҥэ ылбаҕай ырыалар ылланнылар, «Алгыс» аҕам саастаахтар үҥкүү бөлөҕө киэһэни киэргэттилэр. Дьоро күн өйдөбүнньүк уопсай хаартыска түһүүнэн түмүктэннэ.
