Олунньу 28 күнүгэр Элэһин уч. улуус кыра учаастактарын икки ардыгар «Элэһин кубога» күрэх тэрилиннэ. Күрэх Бороҕон нэһилиэгин баһылыгын эбээһинэһин толорооччу Копырин Константин Михайлович эҕэрдэтиттэн саҕаланна. Күрэххэ уопсайа 60 кыттааччы кэлэн 7 көрүҥҥэ илин-кэлин түһүстүлэр. Ол курдук салгын саанан ытыыга, хабылыкка, хаамыскаҕа, түү мээчиги быраҕыы, мохсуо быраҕыы, теннис, дартс, канат тардыһыыта күрэхтэргэ күөн көрүстүлэр. Кыттыыны ыллылар: Саһылыкаан, Арыы-Тиит, Даалы, Элэһин 1, Элэһин 2 учаастактарын хамаандалара. Күрэхтэһии кылаабынай судьуйатынан үлэлээтэ Бороҕон нэһилиэгин И. А. Халдеев аатынан спорт инструктора Габышев Афанасий Афанасьевич. Парады иилээн-саҕалаан киллэрдэ Элэһин СК уус-уран салайааччыта Соловьев Ион Степанович. «Мичилий» дьахталлар түмсүүлэрэ минньигэс аһынан күндүлээтилэр, ылбаҕай ырыаларынан киэргэттилэр Аилита Алексеева, Айаал Копырин. Тыҥааһыннаах киирсии кэннэ 1 миэстэни ылары ситистилэр Арыы-Тиит хамаандата, 2 миэстэ Саһылыкаан хамаандата, 3 миэстэ Элэһин I хамаандата буоллулар. Кыайыылаах хамаандалар мэтээлинэн, грамотанан, сыаналаах бириистэринэн наҕараадаланнылар. Күрэҕи тэрийэн сүүрбүт-көппүт, спонсордары булбут Попов Руслан Лукичка, тэрээһиҥҥэ спонсордаабыт, күүс-көмө буолбут биир дойдулаахтарыгар Элэһин олохтоохторун аатыттан махталларын тиэрдэллэр. Кыра учаастактары чөл олоххо көҕүлүүр сыаллаах «Элэһин кубога» күрэҕи сылын аайы үгэскэ кубулутан ыытыллыа диэн баҕа санаалаахтар. Күрэх кыттааччылара илии тутуурдаах-өттүк харалаах күрэхтэн дуоһуйан-астынан дойдуларыгар үөрэ-көтө айаннаатылар.
