Балаҕан ыйын 12 күнүгэр «Түмсүү» сынньалаҥ киинигэр Россияҕа «Дьиэ-кэргэн», Саха өрөспүүбүлүкэтигэр «Оҕо саас» сылларын чэрчитинэн, биир дойдулаахпыт Саха өрөспүүбүлүкэтин культуратын туйгуна, «Гражданскай килбиэн» бэлиэ хаһаайката, Өктөм норуот тыйаатырын режиссера, Өктөм нэһилиэгин Бочуоттаах олохтооҕо Аржакова Зоя Егоровна «Төрүт дойдум-Тумул» диэн Бороҕон нэһилиэгин Тумул бөһүөлэгин олохтоохторун үйэтитэн бэртээхэй кинигэ тахсыбыт үөрүүтүгэр кинигэ сүрэхтэниитэ тэрилиннэ. Биэчэри салайан ыытта А. Р. Халдеева аатынан сельскай модельнай библиотека салайааччыта Прудецкая С.А. Биэчэргэ кинигэ туһунан санааларын, махтал тылларын эттилэр нэһилиэк аҕам саастаах ытыктанар дьоммут ветеран учууталлар Протопопова З. И., Сокольникова А. С., Макарова А. П., доруобуйа харыстабылын ветерана Новоприезжая Т.У. Тэрээһин үөрүүлээх түгэнинэн буолла Зоя Егоровна сыралаах үлэтин бэлиэтээн, нэһилиэгин дьонун үйэтиппитин сыаналаан Бороҕон нэһилиэгин дьаһалтатын солбуйар баһылыга Протопопов М. С. «Нэһилиэк социальнай-экономическай сайдыытыгар кылаатын иһин» бэлиэни үөрүүлээх быһыыга-майгыга туттарда. Төгүрүк остуол тула олорон истиҥ сэһэргэһии, ааспыты ахтыһыы, инникини түстэһии буолла, биэчэр уопсай хаартыскаҕа түһүүнэн түмүктэннэ. Тупса турдун төрөөбүт төрүт түөлбэбит!
