Сэтинньи 27 күнүгэр Мүрү нэһилиэгэр «Культура сайдыыбыт чыпчаала-норуоппут үйэлээх үгэһэ» Уус-Алдан улууһугар народнай коллективтар күннэрин чэрчитинэн В. В. Никифоров-Күлүмнүүр аатынан «Тойон Мүрү» культура дыбарыаһыгар Тумуллааҕы «Айыллан» норуот тыйаатыра Иван Гоголев-Кындыл айымньытынан 4 хартыыналаах, 6 көстүүлээх «Наара Суох» музыкальнай комедияны көрөөччү дьүүлүгэр таһаарда. Оруолларга «Айыллан» норуот тыйаатырын артыыстара оонньоотулар. Наара Суох-Василий Копырин, Күндү Күлүүк-Наталья Капитонова, Күтэр Бороҥкууйап-Петр Черкашин, ойоҕо Байбаралаах Балбаара-Анастасия Сухонина, уоллара Балтараа Сирэй-Николай Васильев, кийииттэрэ Кыҥнары Кэтэриис-Мария Винокурова, Баачыка-Иван Сухонин, ойоҕо Суон Суоппуйа-Татьяна Габышева, дьүөгэлиилэр-Анна Парникова, Виктория Барашкова оонньоотулар. Туруорааччы режиссер Андрей Макаров, режиссер көмөлөһөөччүтэ Анастасия Сухонина. Көрөөччүлэр «Наара Суох» кэмиэдьийэттэн дуоһуйа сынньанан, астынан ытыстарын тыаһын бэлэхтээтилэр.
